Shoka osha landula oohapu dhomunapaliamende gwoDTA
Jennifer van den Heever ngoka a popi kutya aantu otaya popi kutya otuntila ndjoka oya nuninwa okutaandelitha ombuto yoHIV/Aids.
Van den Heever okwa popi kutya opena aanambelewa yuunamiti yalwe mboka ya popi kutya otuntila ndjoka inayi pumbiwa.
Haufiku okwa popi kutya ke shi kutya omapopyo ngoka otaga zilile peni ihe okwa popi kutya otaga taambathanwa komapandja gomakwatathano gopainternet.
Haufiku okwa tseyithile aaNamibia kutya kwa nongelwa kutya otaku tukuka omukithi goshikwenyene pokati kaAguste naNovemba niipotha yomukithi ngoka otayi londo pombanda kehe omvula.
Pahapu dhaminista iipotha ya thika po-2 350 oya lopotwa mo-2014, omanga mo-2013 kwa lopotwa iipotha 1 346.
“Omiyalu dhoka odha holola kutya iipotha yomukithi ngoka oya lopotwa unene mokati kaantu yoomwedhi 9 noomvula 39. Ngele wa tala koomvula 39 odha kalela po omuyalu omunene gwaakwashigwana,” Haufiku ta ti.
Minista okwa pula kutya aantu mboka taya pangele okuninga uunona inaya pumbwa okuya kotuntila ndjoka.
“Ngele owu na etegelelo nenge to pangele okuninga okanona muule woomwedhi ne ino pumbwa okuya kotuntila ndjoka.”
Okwa popi kutya otuntila ndjoka oya li yi na okukala ya ningwa nale omvula dha piti, ihe ompumbwe yoshimaliwa oyo ya yi moshipala otuntila.
JEMIMA BEUKES