Onga omukalo gwokukaleka po ondjokonona yekondjelomanguluko moshilongo, Uuministeli wIipambele yOonakulwa Aakulu, otawu pangele okutunga ongulumpungulilo yoondjokonona mOutapi mOshitopolwa shaMusati.
Uuyelele mboka owa hololwa komupevi minister muuministeli mboka Hilma Nicanor, pethimbo lyoshituthu shetulo lyemanya pehala mpoka pwa fumbikwa omapendafule ga thika po-27 mOutapi.
Nicanor okwa popi kutya molwaashoka ehala ndyoka oli li oshitopolwa shondjokonona yoshilongo nena osha simana noonkondo opo ku tungwe ongulu yoompungulilo dhondjokonona , ku vule okugwandja nokundunguka aakwashigwana kombinga yondjokonona yekondjelomanguluko lyoshilongo okuza kepangelo lyokatongotongo.
“Otayi ka kala ehala mpoka iinyangadhalwa ayihe ya ningwa mekondjelomanguluko mbyoka ya faalele omwenyo dhaakondjelimanguluko tayi ka ulikwa nokundunguka oshigwana opo shiilonge kombinga yondjokonona yemanguluko lyoshilongo,” Nicanor ta ti.
Omupeha minista okwa pula aakwashigwana mboka ye na uuyelele oundji womondjila kombinga yekondjelomangeluko yiiholole opo ya vule okukuthwa oondjokonona dho dhipungulwe.
Nicanor okwa popi kutya ontseyo yoondjokonona yemanguluko mokati kaakwashigwana onshona noonkondo.
“Ope na uuyelele uushona mboka tawu gandja ethano lyekondjelomanguluko lyoshilongo. Ondjokonona oyindji yaNamibia pethimbo lyekondjelomanguluko kayi li mondjila na oya shangwa kaantu yalwe.”
Okwa popi kutya uupyakadhi wompumbwe yondjokonona yoshilongo owuli omukundu gwa taalela oshilongo, nuuministeli owu na oshinakugwanithwa shokukwashilipaleka kutya okwa kalekwapo oondjokonona dhekondjelomanguluko lyoshilongo.
Mesiku lyotango lyaApilili mo1989, aakwiita 27 yongundu yoSwapo, oya ponokelwa ketanga lyoSouth West Africa Territorial Force (SWATF) nokudhipagwa. Aakwaita mboka oya fumbikwa mombila yimwe mpoka opo tapu ka tungwa ongulu yoonmpungulilo dhondjokonona ngashiingeyi.
KENYA KAMBOWE