Aakuthimbinga ya yooloka mboka ya kutha ombinga momutumba ngoka gwa ningilwa mOshitopolwa shaShana oya yambidhidha oshiyetwa po shokutunga egumbo lyaakokeke moshitopolwa opo ku vule okusilwa oshisho aakokele mboka kaye na aayambidhidhi.
Oshigongi shoka shaakwashigwana osha ningilwa pOombelewa Oonene dhOshitopolwa, na osha ningwa metalelepo lyokomitiye tayi ithanwa Parliamentary Standing Committee on Gender Equality, Social Development and Family Affairs, okomitiye ndjoka ya talele iitopolwa ayihe o-14 moshilongo.
Oshigongi shoka osha kaliwa woo kaanangesesha, aakokele oshowo aaniilonga yokugandja omakwatho gopankalathano naakwashigwana.
Iigongi ya nuninwa okukundathana onkalo ndjoka oya landula etseyitho lya ningwa komunapaliamende, Elma Dienda mOmutumba gwoPashigwana momasiku 26 gaJuni, 2015 ngoka a pula opo ku tungwe omagumbo gaakokele miitopolwa ya yooloka.
Oshiyetwapo shoka osha tulwa momake gokomitiye ndjoka opo yi ninge iigongi noshigwana yo yi ka gandje olopota koPaliamende.
Momasiku 25 gaApilili nuumvo okomitiye ndjoka oya tokola okutalela po omagumbo gaaakokele mIitopolwa ngaashi Ohangwena, Kunene, Omusati, Oshana nOshikoto.
Pauyelele mboka wa gandjwa kOmunashipundi shokomitiye ndjoka, Gotthard Kasuto, elalakano lyiigongi okuuva omaupyakadhi ngoka ga taalela aakokele miitopolwa. Kasuto okwa holola kutya okwa haluka sho kamu na egumbo lyaakokele mOshana.
Okwa gwedha po kutya, sho ya talele po egumbo lyaakokele moTsumeb mOshitopolwa shaShikoto, oya mono kutya egumbo lyaakokele mondoolopa moka kali li pamuthika.
Kasuto okwa popi kutya mOhangwena oya talele po ondoolopa yaEenhana moka namo kamu na egumbo lyaakokele, oya mono woo nkene aakokele taya lumbu moluhepo olunene na kape na ngoka teya sile oshisho.
“Ngoka ogo omatompelo twe ya kaantu opo tu pulakene tse tu ka gandje olopota kOvenduka,” Kasuto ta ti. Oshikumungu sho kutalako omagumbo gaakokele onga oshidhila momudhigululwakalo osha popiwa. Omukokele gumwe okwa popi kutya uuyuni otawu lunduluka, nomoomvula dhonale andola oshikumungu shomagumbo gaakokele kapu nangoka teshi pulakene ihe ngashiingeyi onkalo oya lunduluka naantu oye yi taambako.
“Otu na aanona yetu mboka ye tu hole na inaya hala okutumona tatu mono iihuna ihe omolwa iilonga oya ka longela koondoolopa dha yoloka dhili kokule oshowo kondje yomafuta. Otwa thigwa po owala nuutekulu wetu mboka itawu vulu okutupa omakwatho agehe. Momagumbo gaakokele otatu ka silwa oshisho kaapangi nokulya iikulya yina iitungilutu, mboka yi li omukundu gwa taalela aakokele oyendji,” omukokele ta ti.
Aanambelewa yegandjo lyomakwatho gopankalathano nayo oya popi kutya etungo lyegumbo lyaakokele otali ka kala eyambeko.
KENYA KAMBOWE