Geingob okwa popi ngaaka pethimbo kwa tulwa miilonga, oskola yopaumwene yongundu tayi pangele tayi ithanwa Swapo Party Private School. Geingob okwa popi woo kutya okwa holola omapulo kutya otashi ende ngiini mbela Swapo ta lele oshilongo uulethimbo.
“Otwa li tatu kondjele emanguluko lyoshilongo, mbela oya li ya pula kutya otwa kondjo ethimbo ele,” Geingob a pula.
“Swapo ota lele oshilongo molwaashoka tse ohatu longo nuudhiginini. Otashi ka pula ethimbo opo tu thigepo oshipundi shuuleli.” Aaleli yamwe yoSwapo nayo oya pandula oskola ndjoka ompe na oya popi kutya otayi ka ndungika aaleli aanyasha kombinga yomaihumbato gonawa omanga tayi ya longo woo omusindalandu gwongundu.
Ngoka a kwatele komeho oshituthi shoka, Helmut Angula, rector gwoskola ndjoka Marco Hausiku, Amushanga-ndjai gwoSwapo Nangolo Mbumba, nOmukokoli presidende Sam Nujoma, ngoka e li patron gwoskola ndjoka, oya popi poshituthi shoka. Nujoma okwa popi kutya aatondi inaya pandula ombili ndjoka tayi tyapulwa moshilongo onkene otaya ka mbadhala okweeta uutondwe mokati kaaleli yongundu. Geingob okwa popi kutya oskola ndjoka otayi ka kwashilipaleka kutya aaleli mongundu ndjoka oya ndungikwa nkene ye na okutaalela iikumungu yopaitopolwa, yoshilongo oshowo opolotika yopashigwana.
Okwa popi kutya oshikumungu shuukumwe, uuyuki nemanguluko nashi kwatele komeho oskola ndjoka.
“Okupitila owala mokumona uunongo nontseyo opo tatu vulu okukandula po omaupyakadhi ngoka ga taalela aakwashigwana yetu , tse tu vule okuya pa iikulya niizalomwa,” Geingob ta ti.
Omanga a gandja olupandu kwaamboka ya longo nuudhiginini mongundu, okwa nyana woo mboka taya popi nayi ongundu konima sho ya tulwa pevi.
“Oho ningilwa omalolelo sho wuli pevi. Oho kala tuu omukwaSwapo ngele wa tulwa pevi nenge oto popi kutya Swapo okwa lunduluka molwaashoka owa tulwa pevi?” Geingob a pula.
“Otatu kalekepo omusindalandu gwongundu moskola muka. Swapo oku na ondjokonona, onakuziwa nomuthigululwakalo. Swapo ota kalelele.”
Nujoma okwa popi kutya, oskola ndjoka otayi ka longa aanyasha kombinga yondjokonona yoshilongo, ondjokonona yaSwapo oshowo ooprogramma dhongundu. Angula okwa holola kutya emanitho lyookoosa moskola otali ka kala onkatu yokugandja oopoosa dhuuleli kiilyo mongundu.
Okwa yelitha kutya Namibia oshilongo oshiyamba noonkondo ihe oshi na omuyalu omushona gwaantu mboka ya mono eyambulepo montseyo, oshowo etopolo lyeliko shaathike pamwe.
Hausiku okwa popi kutya shoka sha tegelelwa oshoka kutya oskola itayi ka gandja owala uunongo ihe uunongo nawu kale oshitopolwa shonkalamwenyo yomuntu kehe.
“Iiputudhilo oyindji otayi gandja owala omadheulo goombaapila noonzapo ihe itayi ningi uunongo wu kale oshitopolwa shonkalamwenyo yaantu.”
GORDON JOSEPH
Category: