Okwa holoka uutile omolwa omukithi gwoYellow Fever sho oshipotha shomukithi ngoka sha lopota omasiku ga piti mOshipangelo shaEngela mOhangwena.
Omuyakulwa ngoka edhina lye inali tumbulwa okwa taambelwa moshipangelo shoka sho a monika omadhidhiliko gomukithi ngoka na okwa tuminwa moshipangelo shaShakati.
Shoka osha kolekwa kOmupopiliko gUuministeli gUundjolowele, Ester Paulus, ihe okwa ekelehi omapopyo kutya okwa tukuka omukithi ngoka mOshitopolwa shaHangwena.
“Kape na etukuko lyomukithi ngoka mOhangwena. Omwa lopotwa oshipotha shimwe ihe omuntu ngoka okwa li a yi molweendo moAngola,”Paulus ta ti.
Okwa popi kutya okwa ningwa omakonaakono niizemo yomakonaakono okwa tegelelwa yi ze koSouth Afrika kuyele omwedhi twa taalela.
Onkundana ndjioka oya holoka konima owala sho Namibia a pewa ekunkililo omolwa omukithi ngoka gwa tukuka na otagu tsikile nokufaalela omwenyo dhaakwashigwana moAngola, na okuniwe uutile kutya otashi vulika gu taandele miilongo yopuushiinda naAngola.
Pethimbo a ningwa naye oonkundathana koNamibian Sun kuyele Ominista Bernard Haufiku okwa li a popi kutya Namibia ota longo kehe shoka ta vulu opo a kwashilipaleke kutya omukithi ngoka inagu tukuka moshilongo. Okwa popi kutya aakwashigwana ayehe taya talelepo Angola otaya ka tuntilwa poongamba. ONaminbia Sun oya nongele kutya, Haufiku okwa gandja olopota kaaniilonga pamwe naye mOmutumba gwoPashigwana.
Oshiwike shika ehangano lyUundjolowele mUuyuni olya gandja ekunkililo opo aantu ayehe mboka taya yi koAngola ya tuntilwe nokwiigwamena komukithi ngoka.
Olya lopota kutya aantu 258 oya hulitha komukithi ngoka omanga iipotha ya thika po- 1 975 ya lopotwa okutameka omwedhi Desemba.
Etukuko lyomukithi ngoka moAngola olya taandele miilongo yopuushinda ngaashi Democratic Republic of Congo DRC moChina omwa lopotwa iipotha 11 mbyoka ya taandelithwa kaantu mboka ya li ya yi koAngola. Omadhidhiliko gomukithi ngoka ongaashi, omutse goshipyatagula, oshivu, okwaahena oonkondo nonkungo.
Aantu mboka ya kwatwa komukithi ihe inaya pangwa mbala ohaya hulitha muule wiiwike iyali.
PLACIDO HILUKILWA