Oshiningwanima shoka sha halutha aanamukunda noonkondo osha ningwa uusiku wEtitattu lyoshiwike sha piti.
Mwene gwiikombo mbyoka, Laimi Katanga, okwa hokolola kutya iikombo ye yimwe oye mwiiyaka kuusita sho a li ta litha omutenya gwEtitatu na inayi shuna kegumbo pamwe niikwawo andola yi ka lale koshigunda.
Iilikama mbyoka otaku fekelwa ya adha iikombo mbyoka popepi nondama noye yi ponokele.
Aakwashigwana yopopepi nondama oya popi kutya oombwa pomudhingoloko ngoka odha kala tadhi gwedha nayi lwopotundi 22:00.
Iikombo itatu oya dhipagwa shimwe osha ningwa oshilalo na osha gwile mondama nokusila momeya. Iikombo yilwe iyali oya ehamekwa noonkondo omanga yilwe iyali inayi ehamekwa.
Iikombo mbyoka ya si oya liwa omandjandja kiilikama mbyoka.
Omaponokelo giikombo oga kala nokuholoka momidhingoloko ngoka uule woomvula dha piti.
Omukalimo gwomOhadiwa yaKapombo, Fillipus Sheehama okwa popi kutya okwa kanitha iikombo ye iyali muJanuari onga oshizemo shiilikama mbyoka tayi ponokele iikombo yawo.
Eliphas Hakondji Namhindo, ngoka e li mwene gwomukunda Ohadiwa yaKapombo na okuli omukomeho gwendiki lyaTobias Hainyeko mOndiihaluka, okwa popi kutya omaponokelo ngoka olundji ohaga holoka pokati komwedhi Januari naMei.
“Omupya omunene katu na shoka tatu vulu okuninga molwaashoka omaponokelo ngoka olundji ohaga ningwa mokati komausiku na kape na ngoka a mona kutya iilikama mbyoka oya tya ngiini,” Namhindo ta ti.
Omakasha giilikama ngoka otaga monika ga fa andola goombwa nenge ngoka guuyandje ihe aakwashigwana oya popi kutya oombwa ihadhi ihumbata momukalo gwa tya ngaaka.
Aakwashigwana yamwe otaya fekele kutya omanima ngoka otaga kwatakanithwa nomaulodhi.
“Ngele ongaka otatu pula mwene gwiilikama mbyoka iidhilile iilikama ye nokuyipa iikulya ya gwana opo kayi zemo we yi ye yidhipage iikombo yetu.”
Okwa tsikile kutya ngashiingeyi aakwashigwana oye na uumbanda kutya iilikama mbyoka otayi ka tameka tayi ponokele aantu.
PLACIDO HILUKILWA