Omupresidende nale okwa li omuyenda a simana mOmbala yUukwanyama mOmukunda Omhedi mOshitopolwa shaHangwena, moshituthi shoka sha ningwa mEtitano lya piti.
Hifikepunye Pohamba okwa pewa omagano ga yooloka onga olupandu sho alele oshilongo uule woomvula 10dha piti.
Omunashipundi gwelelo lyUukwanyama, George Nelulu okwa popi kutya pohamba okwa hiwa kOmukwaniilwa gwUukwanyama Kuku Martha Nelumbu ngoka a li a hala okupandula yemwene omuleli nale.
“Omukwaniilwa pamwe nElelo lyUukwanyma oya kala ya hala okutaamba ko egalukilo kegumbo lyaPohamba oshowo okumupandulila oshilonga sha simana shoka a longo pethimbo alele oshilongo nokumupa omukumo opo a tsikile nokudhana onkandangala melelo lyaakwashigwana.” Nelulu ta ti.
Pohamba okuli woomwene gwomukunda Okanghudi mOshikandjo shaNdobe.
Oshituthi shoka osha longekidhwa pehala lyomukwaaniilwa kaanangeshefa mboka ya kwatelwa komeho kuDavid Nghipunduka, Hans Nghihulifwa naJosia Udjombala.
Pohamba okwa pewa omagano ga yooloka mwa kwatelwa oongombe dha thika po-20.
Pohamba okwa pandula omukwaniilwa Nelumbu pamwe naalelwa ye na okwa tsu omukumo aaleli yopamuthigululwakalo ya tsikile nokulesha oompango dhoshilongo opo ya yambulepo ontseyo yawo kombinga yoompango dhoshilongo.
Pohamba okwa uvaneke kutya otaka gandja gamwe gomomagano ge ngoka a pewa kehangano lyoHifikepunye Pohamba Foundation.
Oshituthi sholupandu shoka sha ningilwa Pohamba osha endele pamwe netalelepo lya ningwa kiilyo yokomitiye ndjoka ya ulikwa kOminista yEyambulepo lyOondolopa nOmikunda , Sophia Shaningwa , opo ya ka konaakone oongamba dhomalelo gopamuthigululwakalo niilyo mbyoka oya tsakanene nomalenga omanene mElelo lyUukwanyama.
Okomitiye ndjoka oya thikama po miilyo ngaashi
Omukwaniilwa gwaNgandjera Johannes Mupiya, Joseph Mayuni gwElelo lyoMashi Traditional Authority oshowo Alfonse Kaundu.
Pohamba okwa tegelelwa a katalelepo ehala mpoka tapu tungwa ombelewa ompe yelenga enene Nelulu mOshikandjo shaEudaneko.
HELAO NAFIDI PLACIDO HILUKILWA
Category: