Ngoka a li omukomeho nale gwoElectricity Control Board (ECB) Siseho Chibeya Simasiku okwa hulitha mEtiyali moshipangelo shaKatutura.
Simasiku ngoka a tumbalekwa kehangano ndyoka ali a kwatele nale komeho, otaku popiwa kutya okwa hulitha mEtiyali konima sho a kwatya kuuvu wombanda.
Omukomeho gwoECB,a Foibe Namene okwa popi kutya otaya kala nokudhimbuluka aluhe nakusa moshikondo sheyandjakaneko lyolusheno.
“Eso lyaSimasiku inali guma owala ofamili ye ihe oli li ekanitho enene koshikondo shiikwamalusheno oshowo oshigwana shaNamibia koonono, ito vulu okupopya oshikondo sholusheno moshilongo ino tumbula edhina Siseho Simasiku.”
Simasiku okwa ulikwa nokuninga omukomeho gwoECBmo-2000. Omanga inaku totwapo oECB mo-2000, Simasiku okwa longo mUuministeli wIikwamina nIikwankondo onga amushanga ta kalele.
Okwa tameke okulongela uuministeli mboka mo-1993 onga omupekaapeki omukuluntu gwiikwankondo. Mo-1995 okwa ulikwa nokuningwa omukomeho gwiikwankondo nomo-1997 okwa ningi amushanga ta kalele muuministeli.
Shimwe shomwaamboka apondola, etotepo lyoshiketha tashi ithanwa Revolving Fund on Renewables.
Oshiketha shoka osha totwapo meyambidhidho lyoGerman GTZ noNorwegian NVE na otashi longo sigo onena.
Nakusa ota tumbalekwa woo metotepo lyoNational Energy Policy.
Omanga ina ya moshikondo shiikwankondo, Simasiku okwa longela Uuministeli wIilonga, Omalweendo nOmakwathanano onga omuindjinia omuyambidhidhi.
Iilonga ye yotango konima sho a manitha eilongo lye mo-1978 okwa longo onga omundungiki moUniversiti yaZambia moka alongo uule womvula yimwe omanga ina wayimina oZambia Electricity Supply Corporation (ZESCO) uule woomvula ndatu.
Simasiku okuna uulongelwe woelectrical engineer mboka a mono mo-1978 okuza koSlovak Technical University moCzechoslovakia.
Eilongo lye olya tala unene keungaungo niikwalute na oshe mu ningitha a ninge OmuNamibia gwotango omuluudhe okwiilongela uuindjinia wiikwalute.
ELVIS MURARANGANDA