Okwa tukuka oontamanana sho gumwe gwomaanafaalama mOshitopolwa shaShikoto a kanitha oongombe dhe dha thika po-60 onga oshizemo shokwiikuthila evi nokutula momalogolo iitopolwa yevi shaali paveta, nomonena omuniimuna ngoka ota pula a futwe.
“Ondakanitha noonkondo na otandi pula ohahende yandje opo yi pule iifuta,” omunafaalama Jason Nande Kashimbode ta ti.
Okwa popi kutya okwiikuthilwa evi meni lyofaalama ye na oya topolwa miitopolwa iyali sho pwa tulwa odhalate naashoka osha indike iimuna ye yi kale tayi ka nwa omeya okuza komboola yimwe ndjoka oyo owala tayi adhika mofaalama moka.
Kashimbode, ngoka a popi kutya oshinima shoka osha hwahwameka kuukwamuhoko, okwa popi kutya aalithi yiimuna ye oya kwatwa komalimbililo sho iimuna ya kala ihayi monika we pomboola, nasho ya kaninga omakonaakono okwa lata nayi noonkondo nomuyalu omunene gwoongombe ogwa sa nale kenota.
Omakonaakono gawo oga mono kutya iimuna oya tongolwa okuya komboola kodhalate ndjoka ya thikwa mofaalama ndjoka.
“Oongombe odha li nale kaadhina oonkondo omolwa oshikukuta nonkalo oya nayipala sho inadhi mona omeya uule womasiku gontumba,” Kashimbonde ta ti.
Kashimbonde ngoka e li omukalimo gwomOngha mOshitopolwa shaHangwena okwa hokolola kutya ofaalama ye nenge ohambo yiimuna ye oyi li momukunda Oshikukutu na okwa yi mofaalama ndjoka momvula yo-1991 nokuyi longa nawa pakutulamo nomboola, ihe uupyakadhi owa tameke mo-2007.
Okwa lundilwa aniwa kutya okwiikuthila evi ndyoka nomukomeho gwoshikandjo oshipe shaOlusheshete mOndonga, Eino Amutenya okwa gandja oshitopolwa shimwe shofaalama ye komuntu keeshiwike.
“Onda tindi na onda holola kutya inandi ikuthila evi ndyoka na onde li pewa pamulandu kumwene gwomukunda nale Toteya Mwandinga,” Kashimbonde ta ti.
Kashimbonde okwa popi kutya omayelitho ge oga taambiwako nonkalo oya hulu, ihe uupyakadhi owa holola ishewe mo-2010
sho oshitopolwa shevi lye sha gandjwa po komunambelewa nale gwopolisi ngoka e li omukalimo gwomOndangwa.
“Okwa tameke ta dhiki odhalate ye meni lyofaalama yandje ihe aluhe otwa kala nokuyikutha po, ihe muDesemba gwomvula ya piti, okweshi pondola okutulako odhalate ye ndjoka na okwa tongolako iimuna yandje opo kayi vule okumona omeya.
“Kanda li po pohambo naaniilonga yandje oye ke shi mona owala pwa pita omasiku ogendji niimuna oyindji oya sa nale kenota,” Kashimbode ta ti.
Elenga enene Amutenya inali vula okumonika. Omupopiliko gwElelo lyAaNdonga, Joseph Asino okwa popi kutya Amutenya okwa ya kohambo ye kOnalusheshete hoka kaku na sha omakwatathano goongodhi.
Asino okwa ti ita vulu okupopya sha kombinga yonkalo ndjoka molwaashoka ke na ontseyo yawo ihe okwa holola olukeno lwe omolwa omuyalu omunene gwoongombe ngoka gwa si.
Kashimbode okwa popi kutya oshipotha she kashi shi oshinima oshipe ihe oshi li oshitopolwa shomahwahwameko ngoka ge li ompinge nAaKwanyama mboka ye na oohambo mOndonga.
Omapopyo ge oga kolekwa kuTimo Kafene gwomomukunda Oshanashetemba.
Kafene okwa ti: “Evi ndyoka lya li lya pewa aapopi yElaka lyOshikwanyama otali kuthwa ko nokupewa AaNdonga, nooyene yomikunda nale AaKwanyama omikunda ngashiingeyi otaye dhikuthwa na otadhi pewa AaNdonga.”
PLACIDO HILUKILWA