Oshizemo shehololomadhilaadhilo osha e ta woo ekuthepo lyoongunga dhaailongi mboka ya kala noongunga dhoshiputudhilo shoka.
Nonando oshizemo shoka osha nyanwa koyendji, osha e ta uuwanawa moonkalamwenyo dhaamboka ya kala nokukondja nuudhiginini opo ya vule okufuta iifuta yoskola.
Gumwe gwomaailongi mboka ya taambako nomaako agehe etokolo ndyoka lya ningwa, omunamimvo 21, Laurentius Haindaka, ngoka e li omwiilongi moNUST tiilongele uuindjinia.
Laurentius oya valwa yahetatu kaavali ihaya longo, mboka haya ningi ongeshefa yopetameko opo ya vule okuyambidhidha oyana. Yina omukalimo gwomoRundu na ota yambidhidha oyana yatatu omanga yalwe ye li mesiloshipwiyu lya he.
Laurentius okwa popi kutya okwa kala ta hupu nuudhigu. "Kandi na omukuli gwokwiilongitha naavali yandje oyo haya futu iinima ayihe. Okoosa ndjika ndi na oyi na ondilo nayi moNUST," omwiilongi ngoka ta ti.
Sho a zi koRundu, a tembukile mOvenduka omolwa eilongo lye, shoka osha tula oshinakugwanithwa oshinene komapepe gaavali ye, mwa kwatelwa ofuto yoshiputudhilo, omulalo gwe nenge ehala lyokukala, iikulya, omambo oshowo iipumbiwa ye yakehe esiku. Ina mona ehala momuhandjo ihe okwa popi kutya andola okwa li momuhandjo andola iifuta oya yi pombanda noonkondo.
"Okukala momuhandjo ohashi etitha wu kale to futu oshimaliwa shooN$12 000 kehe oshikako na itandi vulu iifuta mbyoka."
Laurentius ohaya zi mondunda yimwe ndjoka haya hiila nakuume ke mOvenduka.
"Onkundana ndjika ombwaanawa noonkondo. oshimaliwa shika shooN$3 500 otashi pungulwa opo ndi vule okukeshi longitha miipumbiwa yilwe ngaashi okufutila ehala lyandje mpoka handi zi uule woomwedhi ndatu dhi li komeho, okufuta omambo gandje oshowo iipumbiwa yilwe. Ondi uvite kutya shika osha ninga elunduluko enene kaailongi mboka taya nana nuudhigu na itaa vulu okwiishangitha omolwa iifuta mbyoka. Otu shi kutya aailongi oyendji oyeli momagumbo molwaashoka aavali yawo itaya vulu okufuta iifuta mbyoka yi li pombanda noonkondo. Shika otashi kwathele aailongi yiishangithe pwaahena omalimbililo gasha."
Laurentius ke na omikuli dha sha ihe okwa pandula sho aailongi mboka ye na omikuli dhoshiputudhilo na itaya vulu okufuta omikuli dhoka sho monena taya vulu okumona iizemo yawo oshowo okwiishangitha ya tsikile nomailongo gawo.
omiyelo odha patuluka
Omulandithi gwoothewa oshowo iihauto ya longa nale, omunamimvo 23 ngoka eli woo odhigwa David Nelson (kali shi edhina lye lyoshili) okuli gumwe gwomaailongi omayovi mboka oonkalamwenyo dhawo dha thikama manga sho iimaliwa ya pupo nooskola odhe mu patele pondje.
David oku na oongunga dhoshiputudhilo shaNUST dha thika pooN$14 000. Okwa thigipo oskola omvula ya piti, sho oshiputudhilo shoNamibia Students Financial Assistance Fund (NSFAF) sha hulitha po okufuta eilongo lye.
Nonando okwa kala ta nyangadhala opo andola a vule okufuta eilongo lye ina vula okugwanitha iimaliwa opo a shune koskola a ka manithe odegree ye moLogistics & Supply Chain Management.
"Meme gwandje okwa hulitha sho nda li ndi na oomvula 12. Onda kala metonatelo lyamemegona ihe ondjambi ye itayi vulu okufuta oskola yandje molwaashoka okuna woo uunona we mboka a pumbwa okusila oshipwiyu," David ta ti.
David naye okwa wayimine ehololomadhilaadhilo ndyoka lya ningwa oshiwike sha piti, na okwe shi pondola okuya koskola opo a kiishangithe ye a vule okutsikila neilongo lye.
"Kandi uviteko kutya omolwashike NUST ta pula kutya otu na okufuta tango iimaliwa mbyoka tu na omikuli dhe opo tu vule okumona iizemo yetu tse tu vule okukakonga iilonga. Kandi uviteko kutya omolwashike ye na okuindika aantu mboka ye na omikuli ya shange omakonaakono," David ta ti, omanga a gwedha po kutya okwa hala nokuhalelela a mane muKotomba gomvula ndjika.
Gumwe natango omwiilongi ngoka eli momvula ye yahugunina, tiilongele okoosa yoAccountinga and Finance, Esther Tuhadeleni. Okwa hokolola kutya oya valwa omulongo, nahe okwa kanitha iilonga mo-2012 sho eehama ombanda.
Esther oku na oongunga dhaNUST dha thika poN$16 000 naNSFAF okwa li a hulitha po efuto lyoskola ye konima sho andopa oshilongwa shimwe shoka a li iifutile yemwene.
"Ndjika onkundana ombwaanawa kumeme ngoka eli omulongiskola ihe oye owala ta sile oshisho ofamili. Tate sho a tameke okweehama, okwa lombwelendje kutya nandi kale pegumbo molwaashoka ita vulu we okufutilandje."
Pahapu dhomupresidende gwoStudent Representative Council moshiputudhilo shoka, Oscar Mwandingi, ombelewa ye oya kala nokupulakena omahokololo gaailongi mboka ya thiminikwa okuthigapo oskola molwaashoka itaya vulu okufuta omailongo gawo.
Gumwe gwomaailongi oku na oongunga dhoshimaliwa shathika poN$26 000 na okwa li a dhigipo oskola uule woomvula mbali opo a vule okugongela iimaliwa.
Yamwe oya thigipo oskola na oya kongo iilonga ngaashi yokuwapaleka, nenge ya shuna komikunda nokuwayimina ongundu yaaNamibia mboka kaye na iilonga.
JEMIMA BEUKES & FIKAMENI MATHIAS