Epangelo otali ka gandja owala eyambidhidho kaailongi mboka ya pumbwa shili eyambidhidho.
Shika osha kolekwa kOminista yElongo lyoPombanda nOmadheulo, Omundohotola Itha Kandji-Murangi, ngoka a popi kutya itashi ti sha okukwathela aailongi mboka taya ndopa.
Kandji-Murangi ngoka ali omunambelewa gwoDean of students moUnam omanga ina ulikwa nokuninga ominista, okwa popi kutya onga omuvali okwa gumwa noonkondo komaindilo gaailongi.
"Onga ominista ondi na omaiyuvo kutya kehe omwiilongi a tambulwa moshiputudhilo shopombanda okwa pumbwa okuyambidhidhwa, ihe aavali naye shi uveko kutya shika oshe ya guma woo. Mboka taya vulu okufuta omailongo gawo naya fute manga mboka itaya vulu naya konge omakwatho okupitila momilandu dhoka twa tulapo," minista ta ti.
Metine lya piti, epangelo olya pitika opo aailongi mboka itaya vulu okufuta iifuta yokwiishangitha moNUST na oye na omikuli, opo ya tsikile nomailongo gawo.
Minista okwa popi kutya epangelo otali katuka oonkatu mokufutila mboka ye na omikuli na itaya vulu okutsikila nomailongo gawo, ihe haayehe taya ka pewa ekwatho, otaku ka talika kwaamboka ya pumbwa ekwatho shili.
"Otu na omusholondondo gwaailongo okuza moshiputudhilo shaNUST oshowo Unam mboka ya pita nawa ihe inaya vula okufuta oskola naamboka oyo tatu ka kwathela ihe haamboka ya li taya pewa omakwatho koNamibia Students Financial Assistance Fund (NSFAF). Otatu ka tala kutya oyeni po ya piti, molwaashoka otashi kwatha ngiini mbela okufutila aailongi mboka ihaya piti?" minista a pula.
Nonando ongaaka, aailongi otaya ka futilapo omikuli dhoka tadhi ka holoka po konima yomaishangitho, Tjama Tjivikua gwoNUST a yelitha mEtitano.
"Okwa popi kutya oye na okugandja omayakulo ngaashi sha kala. Itatu vulu owala okukala twa tala kombinga yuupyakadhi wopashimaliwa mboka wa taalela aailongo. Ka pe na elongo lyoshali miiputudhilo yopombanda moNamibia nokutameka muJuni gwomvula ya piti sigo onena inatu mona iimaliwa okuza kepangelo. Otatu pula ngiini komeho? Otatu pula epangelo li tu yambidhidhe," Tjivikua ta ti.
Aailongi yaUnam otaya ka tseyithilwa oshiwike shika ngele nayo otaya ka mona ekwatho ngaashi ndyoka lya pewa aailongi yokoNUST.
Pahapu dhomunambelewa gwOmauyelele moUnam, John Haufiku okwa popi kutya ka pe na etseyitho okuza kepangelo kutya otali ka kwathela aalongwa mboka.
"Otatu kaya moonkundatha naminista oshiwike shika opo tu kundathane oshikumungu shoka," Haufiku ta ti.
JEMIMA BEUKES