Swapo okwa sinda po omahogololo gIikandjohogololo oshowo Omalelo gOondoolopa na okwe shi pondola woo okukuthako oshikandjo shaWindhoek East okuza kongundu RDP.
Ngaashi sha tengenekwa Swapo okwa sindanapo omahogololo ngoka niizemo yotango mbyoka ya pitithwa, na oya holola kutya otaka pangela iikandjohogololo 112 yomiikandohogololo 121 moshilongo ashihe.
Esindano ndyoka olya kalelapo konyala oopresenda 93, nongundu ndjoka otayi kakala niipundi ayihe moNational Council.
Pethimbo lyomahogololo ngoka ga ningwa okwa dhidhilikwa omaupyakadhi gontumba omashona, oshowo omuyalu omushona gwaahogololi shoka sha etithwa aantu ya kale taya tyapula ehuliloshiwike lyawo ele pehala lyokukahogolola.
Swapo okwa sindana nale miikandjohogololo 26 omanga inaku ningwa omahogololo.
Shoka osha landula sho oongundu dhilwe dhopolotika dha ndopa okukutha ombinga medhigathano lyomahogololo miikandjo mbyoka.
Momahogololo ngoka ga ningwa mEtitano, oga tseyithwa kutya oga ningwa pauyuuki nopalandulathano, Swapo okwa dhengemo oongundu dhilwe dhopolotika momahogololo agehe gIikandjo nOmalelo gOondoolopa.
Ongundu tayi pangele mOshitopolwa shaKunene oya dhengemo Ongundu yoUnited Democratic Front (UDF) moSesfontein, Khorixas noKamanjab, omanga yakutha ko Oshikandjohogololo shaOutjo. Swapo okwe shi pondola woo okusindanapo oshikandjo oshipe shaOpuwo Urban, nOngundu yoDTA oya sindanapo Opuwo Rural oshowo Epupa.
Shoka osha hala okutya UDF okwa ndopa okusindapo shimwe shomiikandjohogololo mbyoka ya kala melelo lye moKunene.
Nonando ongaaka UDF okwe shi pondola okukuthako natango elelo lyOshikandjo shaDaures mOshitopolwa shErongo.
Sho ongundu ndjoka ya kala aluhe nokusindanapo Oshikandjo shaDaures, Swapo okupitila momuhogololwa gwe Ehrnst Katjiku okwe ina vula okuza mo noshipundi shimwe moshikandjo shoka pethimbo lyomahogololo ngoka ga ningwa mo-2010, ihe monena okwe ya ponomola ontiyali sho a mono omawi 1 390 omanga omuhogololwa gwoUDF Joram !Haoseb a zi mo nomawi 1 584.
Swapo okwa dhengwamo woo mOtjombinde mOshitopolwa shaMaheke komuhogololwa iithikamena Katjanaa Kaurivi ngoka a sindanapo omahogololo sho a mono omawi 1 396. Aaron Marenga gwoSwapo okwa mono owala omawi 681 votes, omanga Mati Ndjoze gwoSwanu a mono omawi 267. Lukas Katjiremba gwoDTA okwa mono omawi 134.
Nudo naye okwe shi pondola natango okusindanapo Oshikandjo shaAminius nOtjinene.
MoAminius Peter Kazongominja gwoNudo okwa sindana nomawi 2 418 omanga Utiriua Kavari gwoSwapo a mono omawi 1 785 na Erwin Katjizeu okwa sindanapo Oshikandjo shaTjinene nomawi 1 529 gomomawi gaahogololi 2 833.
Nudo okwa sindanapo Oshikandjo shaMatako mOshitopolwa shaTjozondjupa, nokukuthako natango elelo lyoKakarara oshikando oshititatu.
MOmatako, omuhogololwa gwoNudo, Israel Hukura okwa mono omawi ogendji okuyeleka nomuhogololwa gwoSwapo Susana Hikopua sho a mono omawi 1 187 omanga Hikopua a mono omawi 1 144.
Omuhogololwa gwoSwapo moRehoboth Theo Diergaardt okwa dhengwamo momahogololo kuWilhelmina Christ gwoUnited People’s Movement (UPM) moRehoboth Urban West.
Christ okwa mono omawi 1 975 omanga Diergaardt a mono omawi 1 479 votes. Omuhogololwa gwoDTA Christiaan Kotze okwa mono omawi 159.
RDP a kanitha Oshikandjo shaWindhoek East
Moshitopolwa shaKhomas Ongundu yoRDP oya kanitha oshitopolwa shoka sha kala koshi yelelo lyawo shoWindhoek East.
Oshikandjo shoka osha kala aashi kondjelwa koRDP nOswapo ihe omuhogololwa gwoSwapo Ruusa Namuhuja okwe shi sindanapo nomawi 1 795 omanga Jens Schneider gwoRDP a mono omawi 1 169, a landulwa kuReggie Diergaardt, gwoDTA ngoka a mono omawi 743.
Mo-2010 Swapo okwa dhengwamo kuRDP nomawi ga thika pe-130. Ongundu ndjoka oyiiyadha ya kanitha iilyo yawo naakomeho mboka ya shuna koSwapo. OOnakushuna ongaashi omuleli nale gwongundu Hidipo Hamutenya ngoka ashuna koSwapo muAguste konima sho a totopo oRDP mo-2007. Hamutenya okwa li nokuli a popitha aakali poshigongi shoSwapo omasiku ga piti mOnooli yoshilongo.
FESTUS NAKATANA