Omuulikwa hogololwa gwOngundu yoRally for Democracy and Progress (RDP) mondoolopa yaHelao Nafidi , Vilho Shimwoshili, okwa popi kutya aahogololi inaya tegelela omalunduluko ngele otaya tsikile nokuhogolola ongundu ndjoka tayi pangele.
Shimwooshili okwa popi ngaaka mOlyomakaya molukanda lyedhina 'Oshipwatapwata' mOshikango.
Shimwooshili ngoka a li ta popitha aakwashigwana okwe ya pula opo kaya ningwe we epuko lyafaathana pethimbo lyomahogololo gAaleli yIikandjohogololo oshowo Aaleli yOondoolopa, ngoka taga ningwa moshilongo momasiku 27 omwedhi nguka tuli.
"Paku hogolola aaleli yoSwapo, Aanamibia otaya ulike kutya aambanda na oya tila omalunduluko. Aantu otaya tsikile nokuhogolola ongundu ya faathana oomvula noomvula, ongundu ndjoka ya ndopa nale okugwanitha po oompumbwe dhawo. Ongundu yoSwapo oya ndopa okuyambulapo oondoolopa ngaashi Ondangwa, Eenhana, Oshakati noHelao Nafidi. Ethimbo olya thikana opo tulundululeni."
"Ina mu hogolola we aaleli mboka taya tsikile nokukala itaya gwanithapo omauvaneko geni nokukandulapo omaupyakadhi geni, ngaashi ompumbwe yomeya ga yogoka, onkalonawa, olusheno nevi."
Oshipwatapwata ehala tali adhika mOshikango. Nonando ka pe na omuyalu gwomondjila kutya olukanda ndoka monena olu na aakalimo ya thika peni, otamu monika iipeleki iipe ya dhengelwa pamwe kehe omweedhi opo mu vule okukala aakwashigwana mboka ya pumbwa ehala lyokuza.
Olukanda ndoka owa totwapo konima shoUuministeli wIitopolwa Elelo lyOondoolopa oshowo Eyambulepo lyUuushayi lya tula miilonga eindiko lyokulanditha evi mondoolopa yaHelao Nafidi oomvula hamano dha piti monena.
Omolwa ompumbwe yokulanda evi oshowo oofamili odhindji tadhi kanitha omavi gawo momake gaanambelewa yelelo lyondoolopa mboka taya longo uulingilingi, olukanda ndoka ohalu edhilile omuyalu omunene gwaakwashigwana kehe omvula.
Pahapu dhaShimwoshili, Oshipwatapwata kashi na olusheno nuundjugo, naakwashigwana otaya thiminikwa ya longithe iihwa. Molukanda moka omu na omakwatathanitho golusheno gaali pamulandu ngoka ge li ga nika oshipoonga noonkondo. Kamu na onkalo ya yogoka oshowo omeya. Shimwooshili okwa pula aakalimo yemu hogolole oshowo ya hogolole iilyo yimwe yoRDP, opo ku vule okuninga omalunduluko. Aahogololwa yamwe yongundu yoRDP moHelao Nafidi ongaashi Johannes Shounyuni, Justina Shilumba, Toivo Petrus, Ernestino Nghiweda, Albertina Fillipus naEfron Ndafelayi.
MERJA IILEKA