Naholo ngoka e li gumwe gwomaatotipo yongundu ndjoka yompilameno okwa popi ngaaka pethimbo lyomutumba ngoka gwa ningwa niikundaneki sho yataambelwa ishewe mOngundu yoSwapo sho ku na owala iiwike iishona ku ningwe omahogololo gAaleli yIitopolwa nOondoolopa.
Yalwe mboka ya shuna kOngundu yoSwapo ongaashi Shapwa Kaukungwa, omukomeho nale gwOkakomisi kOmahogololo moNamibia ano oElectoral Commission of Namibia (ECN) Phillemon Kanime oshowo Magnus Nangombe.
Eshuno lyawo kOngundu yoSwapo olya landula eshuno lyomuleli gwongundu yawo nale Hidipo Hamutenya ngoka a shuna koSwapo oomwedhi dha piti.
“Aluhe megumbo otamu vulu okwaadhana okwaahauvathana nokwaahauvathana hoka oko kwa etitha tu thigepo oSwapo,” Naholo ta ti.
“Iinima oya lunduluka pamwe nelelo epe, omuleli nale Hifikepunye Pohamba oshowo omuleli monena Hage Geingob oya e ta omalunduluko ogendji moSwapo.”
Okwa popi kutya oya yamukula keithano lyaPohamba ngoka e ya ithana opo ya shune oshowo omapopyo gaGeingob kutya “kape na Omunamibia taga thigalapo”.
Naholo okwa tsikile kutya:”Tse otwa nyanyukwa molwaashoka uupyakadhi mboka ya li po kawu po we.”
Kaukungwa okwa popi kutya oya kala taya pangele eshuno lyawo koSwapo, sigo ya yi mekwatathano nAmushanga gwOngundu yoSwapo Nangolo Mbumba mEtitano lya piti.
“Otwa galukile moSwapo molwaashoka omadhilaadhilo getu nomitima dhetu odha kwatwako kekondjo lyOngundu yoSwapo,” Kaukungwa ta ti.
Pohamba okwa li a popi miikundaneki omathimbo ga piti kutya aantu oyendji otaya ka shuna kOngundu yoSwapo.
Pethimbo Mbumba a taambako iilyo mbyoka, okwa popi kutya eshuno lyawo koSwapo otali ulike kutya Swapo okuli ongundu yaayehe moshilongo ndjoka ya pyakudhukwa okulela ngaashi aantu ya hala.
Okwa popi kutya ongundu otayi ka kwashilipaleka kutya Aanamibia oya mona omayakulo ageye ngaashi, uunamiti, elongo nomagumbo.
Mbumba okwa tsikile kutya ombelewa ye inayi mona uuyelele kutya omutotipo gwOngundu yoCongress of Democrats, Ben Ulenga naye ota shuna koSwapo.
Okwa holoka omifofodholo kutya Ulenga ngoka a totopo Ongundu yoCOD mo-1999 konima a thigipo oSwapo otaka thigapo ongundu ye nokushuna koSwapo. Ulenga okwa tindi okuyamukula sha kombinga yomapopyo ngoka itaaga
kolekwa.
ELVIS MURARANGANDA
Category: