Ooskola dhepangelo odha taalela omwaka gwaalongiskola ya pyokoka ya thika po-5 131, pethimbo mpoka epangelo itali vulu okunana aalongiskola ya pyokoka unene mooskola dhomuushayi.
Dhoka odha popiwa kOminista yElongo Katrina Hanse-Himarwa.
Okwa popi kutya monena omuyalu gwaalongiskola moshilongo ogwa thikama 27 325 moka mwa kwatelwa aalongiskola mboka ya pyokoka na otaya kalele ya thika po- 22 869 omanga 4 456 ye li aalongiskola yopakathimbo.
"Otatu thiminikwa konkalo opo tukute miilonga aalongiskola mboka inaya pyokoka oshowo aalongi mboka yeli nale miipundi yevululuko opo tu thitike omwaka ngoka," Hanse-Himarwa ta ti.
Omuyalu gwetu kombinga yaalongi mboka inaya pyokoka otagu ulike kutya oopresenda 60 dhomaalongi mboka 4 500 otaya longo poondondo dhopevi."
Pahapu dhe, minista okwa popi kutya oompito dhiilonga dhoka dhilipo odha tseyithwa na odha udhithwa nale ihe omukalo gwokumona omikanda dhiilonga moshilongo unene kaazaizai oshi li omukundu omunene.
"Onkalo ndjika otayi sitha uunye aanambelewa yopashitopolwa na ohashi etitha opo ya kute miilonga aalongi mboka inaya pyokoka.
Okwa popi kutya uuministeli otawu ka pumbwa iimaliwa yokutseyiha oompito dhoka dhiilonga okuya woo pondje yoshilongo iikando ya thika puiyali momvula.
Uuministeli owuli tawu pangele okuya moonkundathana naakuthimbinga melongo ayehe opo kuvule okukutwa miilonga aazaizai.
Maakuthimbinga moka omwa kwatelwa oNamibian Qualification Authority, Uuministeli wOmatembu oshowo Uuministeli wAaniilonga.
Hanse-Himarwa okwa tsikile kutya: “Uuminitseli owa mono ompumbwe yokukwashilipaleka kutya ooskola dhomuushayi odhina omidhingoloko tadhi shambula opo dhi vule okunana aalongiskola mboka ya pyokoka."
Okwa ti, okwiinekelwa kutya oya pumbwa okugandja kooskola dhoka omayakulo ngaashi omeya nolusheno oshowo omagumbo.
Minista okwa popi kutya uuministeli wawo melongelo kumwe nUuministeli wElongo lyoPombanda owa ningi eindilo kOshiputudhilo shoUniversiti yaNamibia opo shi tule miilonga okoosa yodiploma ndjoka tayi ka dheula aalongi yoondondo dhopevi.
“ Uuministeli otawu ikalekele woo iimaliwa mbyoka ya nuninwa etalululo lyomusindalongo gwoondondo dhopevi oshowo ewapaleko netungululo lyomihandjo dhooskola."
Hanse-Himarwa okwa koleke woo etokolo lyOkabinete kutya momvula twataalela elongo moondondo dhopombanda otali kala lyoshali naanaskola itaya ka pulwa ya fute iifuta yooskola.
"Oshimaliwa sha thika poomiliyona 30 oshiikalekelwa na osha nuninwa etulo miilonga lyelongo lyoshali moshikakomvula twa taalela."
Okwa gwedhapo kutya otaku talululwa woo omusindalongo gwoondondo dhopombanda.
"Epangelo ngashi tashi uthwa ketokolo lyOkabinete, olya tokola woo okuhulithapo iifuta yomakonaakono gondondo onti-10 no-12 mooskola dhepangelo, kakele kooskola dhopaumwene nomoshiputudhilo shaNamcol. Shika otashi ka kala ekwatho enene unene kaavali mboka ihaya vulu okufutila oyana omakonaakono."
ELVIS MURARANGANDA
Category: