Haiwila Daniel, omukwaita nale gwoPeople’s Liberation Army of Namibia ngoka a kala moAngola oomvula 26 dha piti, okwa galukile kegumbo nokuhangana nofamili ye moHelao NAfidi mOshitopolwa shaHangwena oshiwike sha piti.
Omunamimvo 51 okwa hangana naakwanezimo ye mOmukunda Omatunda , momukunda moka a valelwa oomvula 51 dha piti, omanga ina ya kombanda hoka a ka ndjoina etanga lyoSwapo.
Omumwayinagona gwe, Priscilla Mwafangeyo okwa popi kutya Daniel ina galukila moshilongo pamwe nayakwawo pethimbo aagaluki ya galuka na oya kala taya dhiladhila kutya ngiika okwa hulitha.
Nonando ongaaka Daniel ngoka ta holola e na uupyakadhi wopamadhilaadhilo okwa monika komukwanezimo
Ndapewoshali Shikongo, omwedhi gwa piti, aadhika mOshitopolwa shaCunene moAngola.
Sho Shikongo a kambadhala okuya naye kegumbo Daniel okwa tindi ta popi kutya Shikongo ota longele kumwe noombulu na okwa tumwa koombulu opo a ka dhipagwe.
Onkundana ndjoka oya tseyithilwa Uuministeli wIipambele yOonakulwa Aakulu oshowo Ombelewa yaNgoloneya gwOshitopolwa shaHangwena, naNgoloneya Usko Nghaamwa, okwa uvaneke kutya otaka konaakona uuyelele.
Sho oshikundaneki shoNamibian Sun shemu talelepo megumbo lyayinagona mOmatunda oshiwike shika, Daniel okwa popi kutya okwa yi kombanda mo-1980 neipopilo kutya otaka landa oondjuhwa kOshikango ihe okwa taguluka oongamba na okwa dha aakwaita yoPLAN moNamacunde.
“Onda li okanona onkene inandi dheulilwa uukwaita mbala ihe onda kala tandi longo onga ondaadhi. Aanamukunda oya pendje iikulya oshowo ehala lyokulala ihe onda kala handi iyakamo omausiku nokuka lopota kombinga yomainyengo goombulu momukunda,”Daniel ta hokolola.
Okwa dheulilwa uukwaita na okwa tumwa kehala lyomalugodhi hoka a li ehamekelwa noonkondo. Okwa holama uule womasiku gontumba na okwa hupithwa kaakwaita yaAngola naCuba mboka yemu fala koshipangelo.
Ehokolola lyaDaniel kali na unene omungo gwa sha noonkambadhala dha ningwa opo a gandje omatompelo kutya okwa dhigala ngiini koAngola inadhi vula sha molwaashoka ina vula okukala iitulamo mwaashoka ta pulwa.
“Ondi na natango ondjembo oshowo omizalo dhandje dhopaikwaita dha holekwa nawa mombululu yimwe moAngola,”Daniel ta ti.
Sho a pulwa kutya okwa hupu ngiini uule woomvula 26 moAngola, Daniel okwa popi kutya okwa kala owala ha ehela iikulya nokulya moondoloma dhiiyagaya nomomukalo ngoka okwiilongo woo okupopya elaka lyOshiputu. Okwa popi kutya okwa kala ta kongo ofamili ye na okwa kala ngaa yiiyakele moNamibia omalupita.
Sho a galukile kegumbo oshiwike sha piti, aanona yamwe oye mu dhimbulula kutya ‘omulumentu keeli nawa momutse’ngoka yali ya mono pOsasiyona yOpolisi mOhangwena muJanuari.
Omumwayinakadhona, Esther Daniel okwa popi kutya okwe mu mono mEenhana kuyele omvula ndjika ihe inamu dhimbulula kutya omumwayina ngoka a kana.
Ngoloneya Nghaamwa okwa popi kutya otaka tsakanena naDaniel momukunda gwawo Omatunda nokuza mpoka opo taya ka tokola kutya otaya ningi ngiini.
Onkundana ye galukilo kegumbo lyaDaniel, oya fa yomukwaita gwoPLAN, John Mandume Mbwalala, ngoka iistuwa muumbugantu waAngola oomvula dha piti.
PLACIDO HILUKILWA
Category: