Omunashipundi gwoNamvet Jabulani Ndeunyema okwa popi kutya oya tameke okuyalula mOmaandaha. Jabulani okwa popi kutya uuministeli wEgameno nawu ninge oshinima shi li mondjila paku tseyitha kutya Musenge okwa hulitha opo Uuministeli wIikwameni nOmatembu wu vule okugandja onzapo yeso kaakwanezimo yo ya vule okuninga eindilo lyiimaiwa ye yopenzela okuza kehangano lyoGovernment Institutions Pension Fund (GIPF).
MuSepetemba gwo-2008, ehangano lyoNamRight olya popi kutya Musenge pamwe naantu yalwe o-18 mboka kwa hololwa kutya oye li aakwashigwana yomuhoko gwAayelele oshowo aantu 81 mboka taku fekelwa kutya iilyo yOngundu yaUnita oya kana mo-2000 pethimbo lyiikolokosha yopaukulo mbyoka ya holoka mOnooli yaNamibia. MuKotomba gwo-2013 epangelo olya tseyitha kutya Musenge oshowo Mukonda Makuya mboka kwa tseyithwa kutya oya kana, ngiika oya taaguluka oongamba nokuya ya kakale meni lyaAngola.
Etseyitho ndyoka olya nyanwa kOmukomeho gwoNamRight Phil ya Nangoloh, oshowo ofamili yaMusenge. Omukomeho gwopolisi yaNamibia, Sebastian Ndeitunga naye okwa tindi omwedhi gwapiti, owino yaampoka pena Aayelele mboka taku popiwa kutya oya kana omanga epangelo lya tseyitha natango kuyele kutya mboka oyiiyaka mondjeedhililo yEtanga lyOwina hali ithanwa Special Field Force noompadhi dhawo sho dha landulwa aniwa odha yi meni lyaAngola.
“Omanga ofamili yAayelele mboka ya kana ye na omukumo kutya otashi vulika ya kamone natango aakwanezimo yawo, omukulukadhi noyana yaShipoya oye na omaipulo kombinga yomuholike gwawo na oya hala okuuva kutya aakwaita yepangelo oya ekele peni omudhimba gwe,”Ndunyema ta ti.
Pahapu dhaNdeunyema, Musenge okwa li ha longele mOkamba yoNDF , 1st Battalion mOrundu sigo osho a kana momasiku 21 gaApilili mo-2001 lyopotundi 06:30 ongula.
“Onga omuniilonga pamwe naShipoya nale ondi na uuyelele kutya Shipoya Musenge ngoka kwa li taku fekelwa kutya oku li mekatathano naunita mOshitopolwa shaKavango okwa kwatwako kaakwiita yepangelo.
“Ondi ya shi, oopresenda 99 dhaamboka ya longele mokamba ndjoka oye shi kutya oshike sha ningilwa Shipoya.”
CATHERINE SASMAN