Okanona kokamati hoka oka hulitha mehuliloshiwike konima sho ka gwile momuthima guna uule woshinano shoometa 7 momukunda tagu adhika moshitopolwa shaMusati.
Aakwashigwana otaya fekele kutya okanona okasi pethimbo kali ngiika taka kongo omeya momuthima ngoka guli owala oshinano oshishona okuza potenga yomeya ndjoka itayi longo we ya li ya gandjwa omagano kuGermany.
Okanona oka dhimbulikiwa kutya oMartin Andiyatuye Iipinge, omunaskola poAmarika Primary School.
Oshiningwanima shika osha kolekwa komupopiliko gwopolisi yaMusati, Linekela Shikongo, ngoka a poi kutya okwa patululwwa epeko lyomapulaapulo mOpolisi yaKahao.
Iipinge okwa kana ongulohi yOlyomakaya na okwa ka monika owala ongula ya landula kaantu mboka ya ka teka omeya. Aakwashigwana oya popi kutya okamati hoka inaka kala haka yi lela koskola miiwiike ya piti konima sho oprogramma yokugandja oondya kaanaskola kooskola ya hulu momudhingoloko ngoka.
Ompumbwe yiikuya oya dhiminike aakwashigwana ya kale haya yi momakuti okukakonga iiyimati yomokuti nokuza ko ohaya yi komithima dhomeya ya kanwe omeya.
Kansela gwoshikandjo shaTamanzi,
Johannes Iyambo, naye okwa koleke eso lyokanona hoka.
“Otatu fekele kutya okanona okali taka kongo omeya gokunwa momuthima. Onda tegelela aakwanezimo yamone onzapo yeso tse tu tale ngele otatu vulu okuka fumbika nekwathelo lyoprograma ya nuninwa okugandja omakwatho kaantu mboka ya kala inaya talika monakuziwa. Oonakusa momuthingoloko nguka natango ohaya fumbikwa ya dhingilwa momakumbatha esiku ndyoka ya hulitha, pwaahena onzapo yeso nenge ya longithe omakwatho gomafumbiko ngoka ya nuninwa.”
Ompumbwe yomeya
Namibian Sun okwa lopota iikando oyindji kombinga yompumbwe yomeya momudhingoloko gwaAmarika.
Nonando aakwashigwana mboka oyali ya pewa otenga yomeya yongushu yoomiliyona 200 okuza kuGermany. Aaleli yopamuthigululwakalo momudhingoloko oya pula epangelo li gandje omeya kaakwashigwana. Etalelepo ndika olya landula eyamukulo ndyoka lyazi kombelewa yomukalelipo gwaGermany moNamibia, kutya aakwashigwana momudhingoloko ngoka otaya nu omeya inaga yogoka molwaashoka epangeo olya ndopa okupangela otenga yokuwapaleka omeya ndjoka hayi longo koonte dhetango, ndjoka ya tulilwa po aakwashigwana mboka kuGermany oomvula hamano dha piti.
Omukalelipo gwaGermany okwa popi kutya olopota ndjoka kayi na uukwashili.
Namibia Sun okwa lopota kutya, mo-2006 opoloyeka yaGermany naNamibia, yoCuveWater, okupitila moIntegrated Water Resources Management oshowo iimaliwa ya gandjwa koGerman education and research ministry (BMBF), oya tula po otenga yomeya ndjoka hayi longo koonte dhetango na ohayi wapaleke woo omeya gokunwa momudhingoloko gwaAmarika naAkutsima.
Otenga ndjoka oya pula oshimaliwa shoomiliyona 200.
Otenga ndjoka ohayi longo omeya goocubic 3.3 ga yela ihe oya yonuka konima sho ya gandjwa kUuministeli wUunamapya, Omeya nIihwa, mo-2010, nokuza mpoka inayi longa we.
Nonando elelo lyoshitopolwa shaMusati ohali udha omeya motenga ndjoka kehe omwedhi aakwashigwana oya popi kutya omeya ngoka ohaga kalamo owala uule womasiku gatatu.
ILENI NANDJATO