Aanona yekondjelomanguluko mboka taya lumbu mofaalama yaSwapo moBrakwater mOmaandaha oya tomeke omulilo nokuninga omainda mondjila yaVenduka naKahandja.
Opolisi oya ithanwa opo yi ka kalekepo elandulathano ihe shoka osha etitha olugodhi niihauto yopolisi iyali oya yonagulwa omanga aanona mboka ya popi kutya opolisi oya yi moshipala ehololomadhilaadhilo lyo lyombili.
Opolisi oya popi kutya oya thiminikwa okulongitha omiku dhohaasa sho aanona mboka ya indike iihauto yi pite mondjila ndjoka nokulateka aantu mboka yali yuuka kiilonga mOvenduka okuza mOkahandja.
Nonando kape na ngoka atulwa miipandeko, opolisi oya holola kutya omaihumbato gonayi gaanona mboka itaga idhidhimikilwa we.
Omupopiliko gwopolisi Slogan Mathues okwa popi kutya natango otaya konaakona kutya eyonagulo ndyoka lya ningilwa iihauto yawo oli thike peni na otashi vulika ya ka tulemo iipotha.
Aanona mboka oya pataneke omapopyo gopolisi na oya popi kutya yo oyali taya ningi ehololomadhilaadhilo lyawo lyopambili.
Ya geela Simataa
Aanona mboka ya ningwa nayo oonkundathana koNamibian Sun oya holola kutya oya geya omolwa amushanga gwokabinete George Simataa.
Oya popi kutya Simataa okwe ya popitha mEtitano na okwe ya lombwle ya ye koskola na okwa tindi iikundaneki pethimbo ningi epopitho ndyoka.
“Omolwashike te tulombwele tuye koskola nongele okweya kutse pehala lyepangeo oshike ina hala okupopila komeho yiikundaneki,” gumwe gwomaanona mboka ta ti.
Kombinga yokutomeka omulilo, aanona mboka oya lundule opolisi kutya oyo ya tomeke omulilo ngoka.
“Opolisi oya umbu ooholo miihwa naasho dha kwata kiihwa opwa tukuka omulilo.”
Gwumwe gwomaanona mboka Jerry Hamkwaya, okwa popi kutya opolisi oya dhenge aanona yatatu. Aakadhona yaali nomulumentu gumwe, nomulumentu okwa falwa koshipangelo.
Amushanga-ndji gwoSwapo, Nangolo Mbumba okwa popi kutya ke wete kutya omolwashike oshiningwanima shohela sha tukuka, ngele epangelo lyiitulamo mokukandula po omukundu gwaanona mboka.
“Ombelewa yOmuprima otayi ya kwatha. Ominista yIipambele yOmupresidende Frans Kapofi okwa li a yi a ka popye nayo, yamwe oya tumwa komadheulo, oya pumbwa okuuvako nokulandula ooprograma dhepangelo,” Mbumba ta ti.
Sho apulwa kombinga kutya aanona mboka oya geyithwa komapopyo kutya naya shune koskola , na oya popi kutya oya kulupa nokuya koskola, Mbumba okwa popi kutya kape na ngoka akulupa nokushuna koskola.
“Swapo ke na omahangano, uuministeli owepangelo lyaaNamibia ayehe. Epangelo olyo lya hala li ya tumwe komaudheulo hoka taya ka mona iikulya niiyemo yokwiikwatha,” Mbumba ta ti.
GORDON JOSEPH