Elelo lyondoolopa yaTjiwarongo okwa lopotwa tali tidhile aalandithi yokapana momapandaanda konima sho lya landitha po omatala gokulandithila kongeshefa gopaumwene na inali longekidha ehala mpoka tapu ka landithila aalandithi mboka ya kala taya landithile momatala.
Muni ngoka okwa landitha po ehala lyuunene woosquare meta 6 347, koshimaliwa shoomiliyona4.2 kehangano lyoAmago Investment.
Gumwe gwooyene yehangano ndyoka, omukalimo gwomoTjiwarongo, Dr Emirich Paulus, ngoka e li omunambelewa gwomahwahwameko nomauyelele moSwapo mOshitopolwa shaKhomas oshowo omupevi omukomeho gwoshikondo shetonatelo lyomaliko mUuministeli wEmona, Mirjam Onesmus, nakuume kawo kopangeshefa omuChina, Guihua Li.
Mboka ohaya hala okutunga endiki lyiihongomwa lyaatalelipo.
Mayola gwaTjiwarongo, Bennes Haimbodi, okwa koleke elanditho po lyehala ndyoka ihe ina vula okugandja uuyelele kutya aalandithi mboka otaya uka peni.
“Ehala ndyoka otali ningi ehala lyopaumwene ihe otwa ninga etsokumwe namwene gwehala opo aalandithi yaka pitikwe okukala mehala lyawo. Oshi li momake gamwene gwehala okutula miilonga etsokumwe ndyoka,” mayola ta ti.
Haimbodi ina vula okupopya ngele aalandithi otaya kala mehala ndyoka pethimbo tali longwa.
Aalandithi oya popi kutya, muni okwe ya lombwele kutya oteya tungile omatala omape kolukanda.
“Oombesa dhapeni hadhi yi kolukanda hoka kaku na oositola nosasiyona dhomahooli? Ehala ndika olyo owala ehala ewanawa nokulongela. Ohatu landitha kaantu mboka taya piti mondoolopa yetu, ihe kaku shi kaakalimo yomondoolopa. Otwa hala okukala twa kuutumba popepi nondjila ndjoka onene,” gumwe gwomaalandithi ta ti.
Muni otaka gandja ompito yomatindo gelandithepo lyehala ndyoka sigo omEtitano.
Onesmus naPaulus oye na mo uumwene woopresenda 40 kehe gumwe mehangano ndyoka omanga Li e na mo oopresenda 20.
Sho a dhengelwa ongodhi opo a tye sha kombinga yelanditho lyehala ndyoka Onesmus okwa tindi okupopya mongodhi.
Omimvo hamano dha piti Muni gwaTjiwarongo okwa li apula aalandithi yokapana ya lundulule noongeshefa dhawo okuza momapandaanda okuya momatala.
Nonando oya li ya pewa elombwelo aalandithi oyali ya tsikile nokulandithila komeho goosasiyona dhomahooli oshowo pomahala gomagumbo. Mo-2013 aakiintu yaali oya li ya tulwa miipandeko sho ya tindi okwiiyutha kelombwelo.
ILENI NANDJATO