Omuhwahwameki gwevi na okuli omundungiki mOshiputudhilo shoPombanda shaUnam, Job Amupanda okwa indikwa opo a ka gandje oshipopiwa shokutsa omukumo aanaskola moskola tayi adhika mOshitopolwa shaShikoto.
Omundungiki moUnam na okuli gumwe gwomaatotipo yehwahwameko tali ithanwa Affirmative Repositioning (AR), Job Amupanda okwa tindilwa ompito opo a gandje etsomukumo kaanaskola moskola tayi adhika mOnooli yoshilongo mehuliloshiwike lya piti.
Amupanda okwa li ta ka popitha aanaskola pOskola yedhina Nehale lyaMpingana Secondary School mOshitopolwa shaShikoto ihe okwa keelelwa kominute gwahugunina kOmukomeho gwElongo mOshikoto Lamek Kafidi.
Amupanda okwa popi kutya okwa li iithanwa a ka popithe aanaskola onga omundungiki moUnam ihe ha pehala lye mwene.
Amupanda okwa popi kutya eindiko lye olya hwahwamekwa kopolotika, ta popi kutya oye owala a indikwa okupopya omanga ookuume ke yamwe ya kala nokugandja iipopiwa yawo mooskola dhomoshitopolwa shoka pwaahena uupyakadhi washa.
Nonando ongaaka Kafidi okwa ekelehi omapopyo ngoka kutya ye okwa tseyithile owala omukuluntuskola poskola ndjoka kutya omulandu gwomondjila inagu landulwa.
Okwa popi kutya ngoka iindike Amupanda opo a ka popithe aanaskola omukuluntuskola a tseyika nedhina Imene.
“Kandi na ehokololo okupopya molwaashoka onda lombwela naAmupanda yemwene kombinga yomilandu. Inandi mu keelela a popye.
Ngame onda yi kOvenduka mOmaandaha konima sho nda popi naImene. Opo omuntu gwopondje a vule okupopya moskola yepangelo nena okwa pumbwa epitikilo okuza kombelewa yetu,” Kafidi ta ti.
Kafidi okwa popi kutya shoka osho a lombwele Imene.
“Ohela Amupanda okwa tuminendje etumwalaka kongodhi ta popi kutya onde mu indike opo a ka popye poskola. Ngame shoka nda hala omilandu owala dhi landulwe.”
Sha landula eindiko lye Amupanda okwa tseyithile aalanduli ye okupitila komapandja gwomakwatathano gopainternet mboka yahala okuuva kutya omolwashike ina popitha aanaskola naya pule Kafidi.
“Onda yakula oomatumwalaka kongodhi taya tukundje nokupopya iinima oyindji ihe ngame kandi na ko nasha.
Otaya vulu okutsikila, ngame omupiya gwoshigwana naashika kashi shi sha kungame,” Kafidi ta ti.
Omuhwahwameki gwoAR okwa gandja ongodhi yaKafidi komapandja gomakwatathano ta ti “mudhengeleni, mutumineni omatumwalaka kehe ethimbo kehe owili. Mutumineni woo omathano tamu mu pula kutya omolwashike ina halela uunona wa yakwawo uuwanawa.”
“Onda li ndi na okuka popitha aanaskola poskola yaKing Nehale lyaMpingana Secondary School, opo ndi tse omukumo omukumo aanaskola omanga inaya tameka omakonaakono gawo. Onda li nda
pewa ehiyo okuza koskola ndjoka ya shangelendje ombaapila. Ohandi popi olundji naanyasha na ihandi pula epitikilo lyasha okuza kaanambelewa.
Onakuyiwa yetu inayi opala ngele nani otu na aantu yoludhi nduka. Moshinyolwa shandje mEtine, otandi ka shangela ombaapila aanaskola yoskola yaNehale lyaMpingana Secondary School.”
Amupanda okwa popi kutya ombapila ndjoka ote ke yi tumina aanaskola poskola ndjoka omanga inaya shanga ekonaakono. “Ombapila otayi ka topolelathanwa koFacebook, Twitter, Instagram, WhatsApp, email nomomikalo adhihe,”
ELVIS MURARANGANDA
Category: