Mayola gwondoolopa yaNdangwa, Paavo Amwele okwa pitika aalandithi yomomapandaanda ya shune pomahala giindikwa mpoka ya kala nokushingithila iipindi yawo, sha landula omutumba gwelelo lyondoolopa ngoka gwa tokola opo aalandithi mboka ya kuthwe po pomahala ngoka.
Metiyali lyoshiwike sha piti, aakalelipo yElelo lyOndoolopa yaNdangwa oga gandja elombwelo kaalandithi yomomapandaanda unene momukulambo gwondjila onene mondoolopa ndjoka opo ya kale ya hulitha po okulandithila pehala ndyoka muule woowili 24.
Oshikundaneki shika shoNamibian Sun osha tseyithilwa kutya aalandithi yamwe oyi iyutha kelombwelo ndyoka ya pewa omanga yamwe ya yi ya ka gandje omanyenyeto gawo koombelewa dhelelo.
Okwa ningwa aniwa iigongi yopaali ya kaliwa kiilyo yelelo lyondoolopa mwakwatelwa ookansela oshowo mayola gwondoolopa.
Iigongi mbyoka oya tsu kumwe opo aalandithi mboka kaya pitikwe we ya landithile pomahala ngoka ihe naya lundululile uutenda wawo wokulandithila komatala gokulandithila.
Konima yoowili dhontumba Amwele okwa tseyithile aalandithi mboka opo ya shune komahala gawo ngoka taya landithile shaaheli paveta.
“Onda haluka mokuuva kutya mayola okwa ningi ngaaka molwaashoka naye okwa li ta yambidhidha etokolo lyokutidha momapandaanda aalandithi mboka,” onzo ya popi ngaaka.
Amwele sho a ningilwa omapulaapulo okwa zimine kutya okwa lombwele aalandithi ya shune pehala mpoka molwaashoka ina pandula omukalo ngoka tamu ihumbatelwa aakwashigwana mboka na kaye na mpoka taya yi.
Okwa popi kutya inaku ningwa oshigongi naalandithi opo kwaadhike ekandulepo lyomukundu pamwe.
“Aantu naya shune owala ya ka landithile pomahala ngoka omanga tatu kongo omukalo guli nawa gwokukandulapo uupyakadhi mboka. Omuntu ngoka e ku lombwele otashi vulika a kale omunambelewa gwelelo lyondoolopa ngoka ina tseya oshizemo shomutumba ngoka gwa ningwa omutenya,” Amwele ta ti.
Okwa popi kutya osha simana noonkondo opo aalandithi yomopandaanda pamwe naanambelewa yelelo ya a dhe etsokumwe.
Amwele okwa ekelehi omapopyo kutya ope na omahala ga gwana komatala gokulandithila mondoolopa ndjoka, na okwa popi kutya uupyakadhi uunene moshikumungu shoka, opehala mpoka tapu tulwa aantu mboka uuna ya tembudhwa pomahala ngoka haya landithile ngashiingeyi.
KENYA KAMBOWE