Uuyelele mboka owa gandjwa pethimbo lyomahwahwameko ga nuninwa aakiintu mboka yiihumbata ngoka ga ningilwa mOshipangelo shoPaumwene shaMediPark mOngwediva ehuliloshiwike lya piti.
Pethimbo lyomahwahwameko ngoka, osha yelithwa kutya otombo ihayi ningitha uunona uuyelele ngaashi shiitaaliwa koyendji.
Omupangi mOshipangelo shaMedipark, Nangula Angula okwa popi kombinga yeitaalo ndyoka,pethimbo a popitha aakiintu yiihumbata ya thika po-200, mboka ya kala pehwahwameko ndyoka.
“Kashi shi oshili kutya ngele to nu otombo omanga wuli metegelelo otashi indjipaleke ompito yokanona koye opo ka ninge okayelele unene. Kashi shi oshili woo kutya ngele oholi omalemuna pethimbo u li metegelelo nasho otashi indjipaleke ompito opo wu pulumuthe okanona okayelele. Kashi shi oshili kutya ngele oto li omagungu omanga wuli metegelelo otashi ningitha okanona koye ka kale haka yeya unene. Omipopyo dhoka kadhina uukwashili na otwa pumbwa okwiikaleka kokule nadho nopehala natu konge omakwatho gopaunamiti,” Angula ta ti.
Oshituthi shoka sha ningwa koMedipark meyambidhidho lyoStandard Bank noongeshefa dhilwe osha gandja omakwatho gopaunamiti goshali kaakiintu yiihumbata mOnooli yoshilongo.
Oshituthi shoka osha kaliwa woo komunyekadhi gwaNamibia, Monika Geingos.
“Okupitila miiyetwapo ngaashi ehwahwameko ndika, aakiintu otaya ilongo esimano lyokwiilongekidhila omategelelo,” Geingos ta ti.
Geingos, okwa popi kutya okuninga etegelelo oshili oshinima tashi dhigupalitha oonkalamwenyo dha yamwe, naashoka osho tashi etitha aakiintu yamwe ya ekelehi uunona.
“Uuna wa uvu okanona ka ekelwahi, omwenyo gwoye ohagu uvu nayi omolwa okanona hoka taka kanitha omwenyo gwako momukalo guli ngaaka. Oshiwinayi noonkondo na inashi ningwa we. Otatu shi hulitha po owala uuna aakiintu ye na omauyelele oshowo oompito dha mbwalangandja dhokwiimonena iingambekitho yoluvalo nongele aakiintu oya tsikile nokweekelahi uunona, nena naya pangulwe. Itatu gandja uusama ngele nani inatu gandja omakwatho.”
Omukomeho gwoshipangelo shoka, Dr Tshali Iithete, okwa popi kutya oshiyetwapo shoka oshi na oshilonga noonkondo na otaya dhilaadhila okushininga oshinima shokomvula molwaashoka omayambidhidho nokwatho kaakiintu yeli momategelelo oge na oshilonga unene.
“Monakuziwa aakiintu aanyasha mboka ya ningi omategelelo oya kala nokupewa omayele kaakokele ihe ngashiingeyi ihashi ningwa we. Oyendji yomaakiintu yetu aanyasha otaya ningi aavali inaya mona omayele gasha. Osha simana woo okutothamo kutya okweeta pamwe oofamili oshili sha simana monkalamwenyo yopamwe onkene aasamane, oohe yuunona nookuume oya pumbiwa ya kale oshitopolwa shonkalo ndjoka.”
ILENI NANDJATO