Elelo lyoPamuthigululwakalo lyaNgandjera olya koleke kutya oshilyo oshikuluntu shoka sha longele elelo ndyoka uulethimbo, Nahum Kamati Joel, ngoka a kala woo omupopiliko gwelelo ndyoka okwa tidhwa miilonga omolwa okwaahasimaneka Omukwaniilwa Johannes Mupongolitha Mupiya oshowo ompango dhelelo.
Joel, ngoka a za mOshikandjo shOngandjera mUuzilo, keshi we oshilyo shelelo lyoshilongo shaNgandjera okutameka momasiku 18 gaMei noompangela dhokumupingena po odhi li nale pokumanithwa.
Omukwaniilwa Mupiya okwa popi kutya, Joel okwa tidhwa mo melelo lyoshilongo molwaashoka okwa kala tiihumbata nayi uulethimbo.
Okwa ti okutameka omvula yo-2012 okwa kala ita landula oompango dhoshilongo.
“Onga elenga enene okwa li a pumbwa okukala taa lele pakugandja oshiholelwa nokwiiyutha koompango nokukwashilipaleka kutya aalelwa ye otaya gwanitha po woo ompango,” omukwaniilwa ta ti.
Onzo yi li popepi nelelo oya popi kutya omukwaniilwa okwa tokola okutidha Joel molwaashoka ine mu simanekwa na okwa ningi omboola ye pehala mpoka pwa li pwa nuninwa omukwaniilwa opo a ninge ohambo ye.
Omukwaniilwa okwa popi woo kutya iilyo yelelo lyoshilongo otayi taambula oombumbo nokugandja evi oshowo omahala gokutula oomboola kaanafaalama inashi za kezimino lyomukwaniilwa.
Okwa popi kutya onkalo ndjoka otayi e ta euvo lyonayi noontamanana mokati koshigwana.
Joel okwa wayimine elelo lyOmbala yaNgandjera moomvula dho-1970 na okwa taambiwako onga omuleli gwopamuthigululwakalo pamwe nayakwawo yalwe mo-1995.
Okwa koleke kutya okwa tidhwa melelo lyoshilongo sho a ningi omboola ye mohambo ye.
Okwa popi kutya ota lundilwa woo kutya okwa tula mondjato iimaliwa mbyoka ya futwa komutungi gwondjila yaTamanzi na okwa tindi okuninga oshitopolwa shosheendo shoka sha ka ninga oonkundathana nelelo lyUukwambi omolwa oshikumungu shekondjelo lyoongamba dhiilongo mbyoka iyali.
Joel okwa zimine kutya okwa ninga omboola pehala mpoka pwali pwa nuninwa omukwaniilwa ihe shoka hasho shemu tidhitha.
“Omboola naasho nda tindi okuya kUukwmbi oshili ihe kombinga yiimaliwa yondjila kashi shi oshili. Aatungi otaya vulu okugandja uumbangi kutya inaya pandje iimaliwa. Kombinga yomboola onde shi ningi molwaashoka Ongandjera kayi na ompango ndjoka tayi indike omuntu a tule omboola pehala lyuulithilo, noho ha ngame owala nda tula po omboola pomudhingoloko ngoka ihe ongame owala ta talika omeho.”
ILENI NANDJATO