Elelo lyaVenduka otali manithwa euliko lyehangano ndyoka tali ka kwathela mokukonga omunambelewa omukuluntu gwelelo ndyoka, konima sho etseyitho lyolukongo lwomunambelewa ngoka lya ningwa iikando ine na olya ndopa okupingena po Niilo Taapopi ngoka okondalaka ye ya pu ongushu muDesemba gwo-2014.
Fillemon Hambuda oye ta longo ngashiingeye pehala lyomunambelewa omukuluntu gwOshilando shaVenduka.
Omunashipundi gwokomitiye yokukuta miilonga omunambelewa nomukuluntu mOvenduka,
Sven Thieme okwa popi kutya oye li pokumanitha euliko lyehangano ndyoka tali ke ya kwathela mokuulika omunambelewa ngoka.
Sho a pulwa ngele ompito ndjoka naatango otayi ka tseyithwa, okwa yamukula kutya ompito ndjoka oya tseyithwa nale iikando ya thika pu ine onkene inashi pumbiwa opo yi tseyithwe we.
Okwa popi kutya oyali taya thaneke andola opo ku manithwe euliko lyomunambelewa ngoka okuya pehulilo lyaMei, ihe omolwa omafudho ogendji momweedhi nguka shoka itashi ka vulika we.
Sho a ningilwa omapulaapulo, Ominista yEyambulepo lyOondoolopa nUushayi, Sophia Shaningwa okwa popi kutya okwa gandja elombwelo kelelo lyoshilando opo li tseyithulule ompito ndjoka yiilonga nenge li konge ehangano lyokugandja omakwatho gokukuta miilonga aaniilonga opo ku kwashilipalekwe kutya okwa kongwa omuntu ngoka ta wapalele ehala ndyoka.
“Aluhe ohaya lombwele ndje shoka taya ningi ihe onde ya pe omayele opo ya tseyithulule iilonga mbyoka nenge ya konge ekwatho okuza komahangano gokukonga aaniilonga.”
Sho a pulwa kutya okuuvite ngiini sho ehala ndyoka lya kala kaali na omuntu uule wethimbo ele monena, Shaningwa okwa yamukula kutya omaiyuvo ge kage na oshilonga, sha simana okumona omuntu gwomondjila ngoka ta vulu okupewa oshinakugwanithwa shoka.
Kansela gwelelo lyoshilando, Joseph Kauandenge, okwa holola omaiyuvo ge kutya kasha li mondjila sho oshilando kashi na omunambelewa omukuluntu uule wethimbo alihe ndyoka molwaashoka otashi shunitha iilonga monima.
MuMaalitsa okomitiye yowina yelelo lyoshilando oya ningi omutumba opo ku ningwe etokolo omolwa ehala ndyoka lya kala omwaka uule wethimbo ele monena.
Shoka osha landula elombwelo ndyoka lya gandjwa kuShaningwa.
Pethimbo lyomutumba ngoka, ookansela yoshilando oya pewa omikanda dhina uuyelele wolukongo lyomunambelewa ngoka.
“Omikanda dhoka odhi li dha simana noonkondo molwaashoka odhi na omauyelele gopaumwene gaantu onkene kadha li dha pitikwa opo dhi ye komagumbo,” onzo yimwe ya li ya popi pethimbo ndyoka.
Shoka aniwa osha li sha uvitha nayi Kauandenge ngoka a li iitekamo momutumba ngoka.
“Ondi wete kasha li mondjila sho aantu mboka ya kala nomikanda dhoka uule woomvula mbali na oya ndopa oku ulika omunambelewa omukuluntu, taye tu pe owili yimwe opo tu teleshe oombapila dhoka odhindji,” Kauandenge a li a popi momukanda gwiikundaneki.
“Ombaapila ndjoka oyi na omapandja ga thika po-90 na oya tameka netseyitho lyompito ndjoka yiilonga, omapulaapulo oshowo omagwedhelepo. Otwa li twa pewa owili yimwe opo tu leshe ombaapila ndjoka nokugandja omagwedhelepo getu.”
Okwa gwedha po kutya shoka she mu uvitha nayi osho inaya vula okuya nombaapila ndjoka komagumbo.
“Oshiputudhilo shili ngiini shoka inashi inekela ookansela yasho nomauyelele ga holekwa?”
GORDON JOSEPH