Job Amupanda, Dimbulukeni Nauyoma, Elijah Ngurare naGeorge Kambala oya sindanapo oshipotha sho ya li ya fala kOmpangu yoPombanda taya pataneke etitho lyawo mongundu tayi pangele.
Omunongononi gumwe gwopolotika okwa popi kutya elombwelo ndyoka lya gandjwa kompangu otali ulike nkene elelo lyoSwapo lya ndopa okugwanitha po omilandu pethimbo lya tidhwa aanyasha mboka. Aanyasha mboka oya tidhwa mo mongundu tayi pangele omvula ya piti muJuli sha landula ekuthombinga lyawo netotepo lyehwahwameko tali ithanwa Affirmative Repositioning. Monena mboka ya ne otaya shuna mongundu nongundu oya pewa egeelo opo yi fute oopresenda 60 dhiifuta yopaveta yaanyasha mboka ya ne.
Omupanguli Collins Parker okwa popi kutya Swapo ina landula omulandu noveta pethimbo a titha mboka ya ne omvula ya piti.
Phanuel Kaapama okwa popi kutya nonando ompangu inayi gandja elombwelo opo mboka ya shunwe pomahala gawo mpoka ya kala mEwawa lyAanyasha moSwapo, aanyasha mboka natango otaya hwahwameke mongundu nonando kaye na oompito dhopombanda.
Amupanda okwa popi kutya “Otwa hulitha po onkalo yokuninga omatokolo gopauhandimwe ga nuninwa aantu yalwe nokushuna miilonga ompango. Ndika kali shi esimano lyandje nenge esimano lyetu, ndika esindano lyuuyuuki. Otwa hala okukwashilipaleka kutya omaihumbatelo gaantu goludhi nduka ina ga ningilwa we nando omuntu. Shika oshilongo shetu shoka sha tungwa po kombinzi nepupyu lyomapendafule getu. Kasha li shi na noompito dhiilonga, tse otwa nyanyukwa owala kutya ngula uuna aantu taya kala nomaiyuvo ga yooloka nena itaya ka ihumbatelwa nayi”.
Aanyasha unene naayambidhidhi yaalumentu mboka ya ne ya kala mompangulilo oya tameke taya imbi sha landula sho omupanguli a gandja etokolo lye. Amupanda ina koleka nenge a tinde kutya otaka tala omeho pompito yopombanda moSwapo Party Youth League (SPYL) momutumba gwomahogololo ngoka tagu ningwa kolutu ndyoka. Omanga ina tidhwa Amupanda okwa li omupopiliko gwolutu ndyoka oshowo oshilyo shokomitiye tayi ithanwa National Executive Committee (NEC).
“Pa maiyuvo gandje kandi wete pe na shoka tashi ya indike opo ya ka kuthe ombinga medhigathano lyoompito dhoka dhopombanda momahogololo ngoka taga ningwa momvua twa taalela, nuuna ya sindana nena shoka otashi kala esindano enene kaanyasha mboka,” Kaapama ta ti.
Amupanda natango okwa popi kutya otaya tala nawa etokolo molwaashoka yo yamwe oya koka nonando kashi shi moomvula na oyiitulamo mokukwatela komeho aanyasha kaye shi owala mboka yongundu na oya hala ya gandje omayele gokudhilaadhila kaanyasha ya manguluka, taya kwatelemo aanyasha moongeleka, moongeshefa oshowo aanyasha yoongundu dhompilameno. Okwa popi woo kutya oya hala Ewawa lyAanyasha mongundu tayi pangele li kwatelwe komeho kaanyasha ye na elalakano.
Konima sho etokolo ndyoka ya gandjwa, omukalelipo gwopaveta gwoSwapo, Dirk Conradie okwa popi kutya ina uva oshindji shoka sha popiwa komupanguli na okwa uvithwa nayi unene koshizemo.
“Otandi ka lesha oshizemo shoka ihe ondi uvite nayi, otandi ka gandja omayele komuyakulwa gwandje opo a pataneke oshizemo shoka.”
Ominista yUuyuuki na okuli amushanga gwiikwaveta kOngundu yoSwapo, Albert Kawana okwa popi kutya ongundu otayi ka nongonona etokolo na otayi ka tokola kutya otayi pula komeho ngiini.
GORDON JOSEPH