Okwa dhidhilikwa e yo pombanda enene miimbuluma mbyoka hayi longwa noondjembo.
Kwiikwatelelwa komiyalu dhiimbuluma dhoka dha pitithwa kOmukomeho gwOpolisi yaNamibia, Sebastian Ndeitunga, iipotha yomadhipago 388 oshowo iipotha yonkambadhala yomadhipago ya thika po-1 050 ya longwa noondjembo, oya lopotwa moshilongo pokati komwedhi Januari gwo-2011 nomwedhi Januari 2016.
Omiyalu dhoka odha tseyithwa pethimbo kwa tulwa miilonga oshigongiilonga shoka tashi tala komagwedhelepo opo ku tulwe miilonga oompango nekondololo lyoondjembo moshilongo.
“Oomwenyo dhaakwashigwana yaahe na ondjo, unene aakiintu otadhi kana kehe esiku omolwa elongitho pambambo lyiifufuta. Onkalo ndjoka oya pumbwa okuhulithwapo molwaashoka elongitho pambambo lyoondjembo itali tula owala ombili negameno lyoshilongo moshiponga ihe otali shunitha woo pevi onkalo yopaliko moshilongo negameno lyoongamba dhoshilonfo,” Ndeitunga ta ti, moshipopiwa shoka sha leshwa pehala lye komupevi gwe, Desiderius Shilunga.
Okwa popi kutya eyakelo lyoondjembo moshilongo, otali hwahwamekitha iimbuluma yomiyonena, eyakelo lyiingangamithi moshilongo, uulunga wiimuna oshowo uukongo waali paveta. Miilongo yimwe iilwitho mbyoka oyo tayi hwahwameke uukulo nepiyaganeko lyombili yaakwashigwana.
Sho a popi poshituthi sha faathana, Omupevi Minista gwoNampol Daniel Kashikola, okwa popi kutya, epangelo oli na omalimbililo omolwa okwaahena ekondololo lyoondjembo moshilongo.
“Oondjembo dhaahena oombapila odho tadhi longithwa miikulumuna oyindji mbyoka tayi holoka moshilongo nopolisi otayi tsikile nokukwatako iilwitho mbyoka,” Kashikola ta ti.
Kashikola okwa tseyithile aakali poshigongiilonga shoka kutya Minista Charles Namoloh, okwa tokola okulonga kehe shoka ta vulu opo ku ningwe omalundululo nokutalululwe ompango yiilwitho niikuti yomo-2008.
Namibia okwa mono omagano okuza kuUSA , nomagano ngoka ogo ku gandja omadhidhiliko kiilwitho. Aanambelewa yopolisi ya thika po-10 oya dheulwa nkene omulandu ngoka hagu longo.
OTIS FINCK