Okila yomidhimba mOpolisi yaVenduka oya pula opo yipewe ekwatho lyoshimaliwa yi vule okufumvuka omidhimba dhaantu ye vulithe po-70 dhoka tadhi adhika mokila ndjoka ya nuninwa owala okukala nomidhimba 24. Momidhimba dhoka omwa kwatewa omidhimba dhuunona 18 okuza mo-2012.
Uunona oundji oomboka wa adhika weekelwahi momilamba, miihwa oshowo miiyekelwahi yiiyagaya. Wumwe owa hulithila miipangelo ihe omidhimba dhawo inadhi ilwa ko.
Iilyo yopolisi koshitopolwa shokila yomidhimba oya popi kutya uuna kwa fumbikwa omidhimba dhoka otashi ka gandja ompito yehala mokila. Omupeha kOmufala moNampol, Jooste Mbandeka okwa yeleke kutya eindilo lyomayambidhidho opo ku vule okufumvikwa omidhimba dhoka oshi li mondjila molwaashoka oshikondo kashi na mo oshitopolwa shiimaliwa mbyoka ya nuninwa okufumvika omidhimba dhoka inadhi ilwako kaakwanezimo.
Warrant Officer Oscar Shatipamba okwa popi kutya oya ningi eindilo kOshikondo shUundjolowele nOnkalonawa.
Shatipamba okwa popi kutya kashi na kutya olye ta gandja omayambidhidho kakele owala kutya oya hala ku ningwe omafumviko golela.
“Sha pe na owala oshimaliwa omidhimba otadhi vulu oku fumvikwa.Oshimaliwa osho owala sha pumbiwa.” Okwa popi kutya aanambelewa yuundjolowele otaya tsu kumwe nefumviko lyoonakusa mboka ashike etokolo lya hugunina otali ka kala ngele ope na oshimaliwa nenge kape na sha.
Oonkambadhala okumona omayamukulo okuza kOshikondo shUundjolowele odha hulile muunyengi sho inakuza eyamukulo omanga onkundana ndjika inayi nyanyangidhwa.
Omidhimba dha thika po-12 okwa lopotwa odha za mo-2012, nomo-2013 odhili natango 12.
Omidhimba 53 odhaalumentu omanga 10 dhaakiintu.
Omunambelewa gwoforensic pathology technician okwa popi kutya omuyalu guli pombanda dhomidhimba mokila yopolisi otagu etithwa kaakwanezimo nookume mboka kaye shi ngele akwanezimo yawo nenge ookume yawo oya hulitha.
Ope na woo omudhimba gwokanona kokakadhona hoka ka sile moNoordoewer muSepetemba gwo-2012, oshowo okanona kokakadhona hoka ka hulitha keso lyopaushitwe mOshipangelo shaKatutura muMaalista gwo-2013 oshowo okanona kokamati hoka kaadhika keekelwa momulamba muDesemba gwo-2013 okeli momusholondondo gwomidhimba dhoka opolisi ya hala okupa omafumviko golela.
Omupevi kOmufala Mbandeka ngoka e li omukomeho gwoshitopolwa shoforensic pathology moNampol,okwa popi kutya sho omidhimba dhoka inadhi ilwa ko otashi etitha opo opolisi kayi manithe omakonaakono miipotha. Okwa popi kutya osha pumbiwa opo omidhimba dhiilweko molwaashoka opo owala opolisi tayi vulu okumanitha iipotha. Okwa popi kutya okudhimbulula omidhimba dhuunona dhoka dha ekelwahi oshidhigu noonkondo molwaashoka oyiikolelela owala komauyelele goombangi mokudhimbulula aavali yuunona mboka.
JANA-MARI SMITH