Sho Lena van Wyk a adha okatekulu ke koomvula mbali keli mekunku lyombinzi ya yina ongula yOsoondha ka hala okuyama, okwa kwatwa komalimbililo kutya ope na oombwiinayi.
Omonakadhona gwaVan Wyk, Letichia du Plessis, okwa dhipagwa komusamane gwe mehuliloshiwike na otashi ulike kutya okanona kawo koomvula mbali hoka ka adhika mombinzi ya yina oka mono nkene oshiningwanima shoka sha longwa. Oshiningwanima shoka osha thigi aakwashigwana momalimbililo.
“Ngame Omukriste na ondiinekelwa muKalunga ihe kandi shi ngele otandi ka dhimbwa tuu oshiningwanima shika,” Van Wyk ta popi omanga a kwatwa uudhigwa wuutekulu we.
“Sho ndayi kuye ndi ke mutalelepo ongulohi yolyomakaya lyopotundi onti:21:00 onda uvu omuntu ta lili pevi ihe onda dhilaadhila kutya okanona hoka okashona haka kala aluhe taka lilipe omahini gako, ngiika ethimbo ndyoka olyo a pondo omumwandje opo kaakuge.”
Ongula ya landula okwa tumu aniwa uunona wuukadhona wu katale iikutu yawo ihe owa galuka tawu popi kutya yina ina hala okupenduka.
Omumayinamati gwaLetichia okwa yi opo a katale kutya oshikwashike na okwa teya po omuyelo ihe okwiitsu momudhimba gwamumwayiona pamwe nomusamane gwe.
Pahapu dhopolisi, Letichia okwa tsuwa nombele sigo omeso omanga Deano du Plessis iidhipaga pakwiiwendela uuzigo.
“Okwa lombwelendje (mumwayinamati) kutya inandi ya mo megumbo molwaashoka kamu li nawa ihe onda yi e ta ndi kutha mo omutekulu gwandje okupitila mekende molwaashoka iikutu ye yokulala oya li yuudha ombinzi ya yina,” Van Wyk ta ti.
Ofamili natango kayi shi shi kutya Du Plessis okwa yi mo megumbo ndyoka ngiini molwaashoka oya lundulula omakumba esiku olyo tuundyoka.
Ondjokonona yemonitho lyiihuna
“Ina kala a hala we okuya kopolisi molwaashoka kayi na shoka ya ningi po,” Van Wyk ta ti.
Van Wyk okwa popi kutya okamona oka kala muutile womusamane gwako uule woomvula heyali dha piti, na oka kala ihaka ningi iituthi yoKrismas nenge evalo lye oshowo lyuunona we.
Pahapu dhofamili, opolisi inayi gandja ekwatho lyasha.
Naasho Du Plessis a li a kwatapo ombambyona omukulukadhi gwe nokumufala mofaalama yopopepi moka a kambadhala okumudhipagela, opolisi inayi gandja ekwatho.
Sho a hokololele yina oshiningwanima shoka, Letichia okwa popi kutya omusamane gwe okwe mu manga nosoletapa komulungu na okwe mumanga komagulu nomaako.
Okwa li woo e na owenda yi na uuzigo uumbulawu ku niwe einekelo kutya oyo a longitha mokwiidhipaga.
“Sho a galuka kali ta vulu okupopya uule wowili yimwe na okwa tameke ta lili. Okana ke oka li kuudha iilalo,” yina yanakusa ta popi.
Nonando opwa li omaumbangi agehe okuza kofamili oshowo omapopyo gaDu Plessis ta lombwele omukulukadhi gwe kutya ota pangele oku mu dhipaga, opolisi inayi ninga sha.
“Otwa gandja uuyelele awuhe kopolisi; otwa lombwele opolisi mpoka tayi vulu okumu adha ihe inayi ninga sha. MOsoondaha ayehe opo ya li mpaka,” Van Wyk ta ti.
Komanda gwopolisi yaRehoboth, Max Joodt okwa koleke kutya iipotha yemonitho lyiihuna oya patulula ihe ina vula okuyelitha kutya omolwashike iipotha mbyoka inayi landulwa.
“Kehe oshipotha oshi na ombinga yasho nuuna oshipotha kehe sha lopotwa nena oshina okukonaakonwa komunambelewa omukonaakoni. Omauyelele agehe haga monika po ohe ga pewa, onkene kandi na we shoka tandi vulu okutya,” komanda ta ti.
Ofamili oya popi kutya oya kala nokudhengela omukonaakoni Desery Freygang, oya popi woo kutya oya pula opo omukiintu ngoka atulilwemo egameno ihe okwa li a tindilwa ompito ndjoka. Sho a ningilwa omapulaapulo, Freygang okwa tindi okupopya sha.
JEMIMA BEUKES
captions
A THIGWA PO: Lena van Wyk okwa popi kutya ke shi kutya ota dhimbwa ngiini eso lyokamonakadhona.
ETHANO: Garwin Beukes